BPSU sinimulan ang BS RadTech program sa Region 3

Pormal nang inilunsad ng Bataan Peninsula State University (BPSU) ang Bachelor of Science in Radiologic Technology (BS RadTech) sa ilalim ng College of Allied Health Sciences—isang makasaysayang hakbang na nagtatala sa BPSU bilang kauna-unahang state university sa Region 3 na mag-alok ng naturang programa. Layunin ng inisyatibo na palawakin ang oportunidad para sa mga estudyanteng nagnanais pumasok sa larangan ng diagnostic imaging at radiologic sciences.

Ayon sa pamantasan, naging posible ang pagbubukas ng programa sa pamamagitan ng suporta at P30-milyong pondo mula sa Commission on Higher Education – Regional Office III. Bahagi ito ng patuloy na pagpapalawak ng BPSU sa larangan ng allied health education upang makapagsanay ng mga propesyonal na tugma sa pangangailangan ng industriya. Ang curriculum ng BS RadTech ay nakatuon sa kasanayan sa diagnostic imaging, radiographic procedures, radiation safety, computed tomography, at iba pang makabagong teknolohiya sa medisina.

Sa kasalukuyan, may 25 estudyanteng nakapag-enrol sa unang batch ng programa, na maaaring magbukas ng landas sa mga trabaho tulad ng radiologic technologist, CT/MRI technologist, nuclear medicine technologist, at diagnostic imaging specialist sa lokal at internasyonal na institusyong pangkalusugan. Pinuri rin ng unibersidad ang pamunuan, kabilang sina University President at OIC-Associate Director ng CAHS Dr. Ruby B. Santos-Matibag at Dr. Marcelino E. Mendoza, Dean ng School of Radiologic Technology, para sa kanilang mahalagang papel sa pagpapalawak ng mga allied health programs ng BPSU.