Food Bazaar sa Morong Discovery Park

Naging isang masayang pagtuklas ng kasaysayan sabay sa pagtikim ng iba’t-ibang putahe ng mga pagkain ang inihandog sa Food Bazaar sa Morong Discovery Park, na dating Bataan Technology Park nitong huling tatlong araw ng Marso, 2026.

Ayon kay Mayor Leila linao-Muñoz, siniguro nila na ang mga panauhin, bisita man o turista, ay mararanasan ang makulay na kultura, pagkain at alaala sa hapag kainan sa kanilang isinagawang Food Bazaar. Pami-pamilya, magbabarkada, magkakaibigan, lahat ay masayang binalikan ang mayamang kasaysayan ng lugar habang ninanamnam ang orihinal na pagkaing-Morong.

Upang mapabilis at maging maginhawa ang biyahe ng mga magsisipunta ay naglaan ang Pamahalaang Bayan ng Morong ng free shuttle bus na ipinarada sa harap ng kanilang Tourism Office, kung saan ay makikita rin ang mga oras ng biyahe papunta at pabalik sa poblacion ng Morong.

Ayon pa kay Mayor Leila, ang nasabing pasilidad ay kasalukuyang sumasailalim sa malawakang pagpapaunlad ng Bases Conversion and Development Authority (BCDA). Ayon kay BCDA OIC Senior Vice Pres. Engr.Mark Torres, layon ng BCDA na gawin itong Tourism Hub, at lugar para sa mga seasonal events, cultural nights, fun run at iba pang programa.