Pasilidad sa pagproseso ng kasoy sa Bagac

Pinalakas ng Department of Environment and Natural Resources (DENR) ang kabuhayan ng mga magsasaka sa upland community ng Bagac matapos nitong ipagkaloob ang isang pasilidad para sa pagproseso ng kasoy sa ilalim ng Community-Based Forest Management (CBFM) program. Ang proyekto ay ibinigay sa Barangay Small Coconut Farmers Association of Parang, Inc. (BSCFAPI), isang samahan ng mga magsasakang may hawak ng CBFM agreement.

Ayon kay Ralph Pablo, makatutulong ang bagong pasilidad upang mapataas ang halaga ng mga produktong agrikultural ng samahan, mapalawak ang kanilang kita, at mapatatag ang kabuhayan ng komunidad habang pinangangalagaan ang likas na yaman. Bukod sa kasoy, gumagawa rin ang grupo ng buko pie mula sa mga niyog sa kanilang lugar bilang dagdag na pagkakakitaan.

Nagbigay naman ng technical training ang Bataan Peninsula State University para sa enterprise management at product development, habang tiniyak ng DENR na may matatag nang pamilihan ang mga produkto ng samahan sa pamamagitan ng ugnayan sa Hermosa Ecozone. Bahagi ito ng patuloy na programa ng pamahalaan upang isulong ang sustainable livelihood at pangangalaga sa kagubatan sa mga lokal na komunidad.