SBMA, ginawaran ng parangal para sa Paperless Initiatives

Nakatanggap ang Subic Bay Metropolitan Authority (SBMA) ng Special Citation at Certificate of Recognition mula sa Development Academy of the Philippines (DAP) dahil sa matagumpay na pagpapatupad ng Document Management System (DMS), isang paperless solution para sa mas episyenteng kolaborasyon.

Personal na tinanggap ni SBMA Office Services Department OIC Manager Jaime Menor, Jr. ang pagkilala mula kay DAP President at CEO Leocadio S. Sebastian sa 2025 Powering Productivity event sa Luxent Hotel, Quezon City noong Nobyembre 11.

Kinilala ng DAP ang pagsisikap ng SBMA na makatipid ng isang milyong pirasong papel sa pamamagitan ng digital na pagproseso ng dokumento at inter-office communication sa 46 na tanggapan ng ahensya. Bahagi ito ng layunin ng SBMA na maging isa sa mga pinakaaktibong paperless government agencies sa bansa sa pagtutok sa modernisasyon at digital transformation.

Ang 2025 Powering Productivity event, na may temang “Powering Productivity: Unlocking Ideas, Enabling Innovation,” ang nagsilbing culminating activity ng dalawang programa ng DAP Center of Excellence on Public-Sector Productivity. Tampok dito ang pitching competitions at awarding ceremony para sa mga natatanging kabataan at public-sector partners, na nagpakita ng inobasyon, kolaborasyon, at pangkalahatang pagtutulak sa pagpapahusay ng produktibidad sa bansa.