banner

Larong tennis muling bubuhayin sa Samal

Written by
  • Zeny S.
  • 11 months ago

Kilala ang bayan ng Samal sa larong tennis katunayan, may tennis court dito na malapit sa plaza. Dati, sinasabing ang larong ito umano ay pangmayaman lang subali’t pinatunayan ng mga ordinaryong kabataang Samaleno na kahit sila ay nahilig sa sports na ito at nagdala ng maraming karangalan sa bayan ng Samal. Ayon kay Atty. Jay Consunji, madalas umano siyang mapiling ipadala noon sa mga kompetisyon gaya ng CLRAA at pinapalad namang maging kampeon.

Sa isang usufruct agreement sa pagitan ng Pamahalaang Bayan ng Samal sa pamumuno ni Mayor Aida Macalinao at Samal Tennis Club (STC) na ang presidente ay si G. Edwin Pardillo, muling bibigyan ng buhay at kakaibang sigla ang nasabing laro.

Sa nasabing kasunduan, ipagagamit nang eksklusibo sa STC ang may 1, 046 metro kwadradong lugar, gayundin ang clubhouse sa loob ng 25 taon simula 2021 hanggang 2046. Samantalang pagagandahin at pauunlarin naman ng STC ang nasabing tennis court at kapaligiran nito.

Ang nasabing kasunduan ay nakapaloob sa Sangguniang Bayan Resolution no. 21-115 series of 2021 na nilagdaan noong ika-28 ng Disyembre 2021 nina Mayor Aida Macalinao kasama sina Vice Mayor Jun Espino, mga miyembro ng SB, G. Edwin Pardillo at iba pang opisyal ng STC.

Article Tags:
· ·
Article Categories:
News

Leave a Reply

Shares